Maktablarda dars soatlarini taqsimlashning yangi ustuvor tartibi tasdiqlandi

Maktabgacha va maktab ta’limi, Iqtisodiyot va moliya hamda Sogʻliqni saqlash vazirliklarining qoʻshma qarori bilan maktablarda sinflarni komplektlash va dars soatlarini taqsimlash tartibiga muhim oʻzgartirishlar kiritildi.

Ustozlar uchun eng asosiy yangilik — dars soatlari oʻqituvchilarga qanday ketma-ketlikda (kimgadir koʻproq, kimgadir kamroq) berilishi qat'iy belgilab qoʻyildi. Yangi tartibga koʻra, har yili 15-sentabrga qadar pedagogik kengash tomonidan darslar quyidagi ustuvor ketma-ketlik asosida taqsimlanadi:

Oliy malaka toifasiga ega oʻqituvchilar (sertifikatning amal qilish muddatiga koʻra);

Milliy yoki xalqaro sertifikatga ega oʻqituvchilar (ustama toʻlanadigan darajadagi sertifikatlar);

Birinchi malaka toifasiga ega oʻqituvchilar;

Ikkinchi malaka toifasiga ega oʻqituvchilar;

Oliy maʼlumotli toifasiz oʻqituvchilar;

Qayta tayyorlash diplomiga ega oʻqituvchilar;

Oʻrindoshlik (sovmestitel) asosida ishlayotgan oliy maʼlumotli oʻqituvchilar;

Oliy taʼlim muassasalarining pedagogika yoʻnalishi boʻyicha 3- va undan yuqori kurs talabalari;

Oʻrta maxsus, professional maʼlumotga ega oʻqituvchilar (faqat oliy maʼlumotli kadr topilguniga qadar va faqat boshlangʻich sinflarda);

Maktab rahbariyati (faqat oliy maʼlumotli oʻqituvchilar bilan toʻliq taʼminlanguniga qadar).

Boshqa muhim o'zgarishlar va qo'shimchalar:

Boshlangʻich sinflar uchun talab: Boshlangʻich sinflarga dars berishda oʻqituvchining boshlangʻich taʼlim mutaxassisligiga ega ekanligi yoki shu fanni boshlangʻich sinflarda oʻqitish metodikasini oʻqiganligi inobatga olinadi.

Qayta taqsimlash huquqi: Maktabning pedagogik kengashiga dars soatlarini zaruratga ko'ra qayta taqsimlash huquqi berildi.

Terminologik o'zgarishlar: Hujjatdagi eski tushunchalar yangilariga almashtirildi (masalan, "xalq ta'limi" va "moliya" bo'limlari "maktabgacha va maktab ta'limi" hamda "iqtisodiyot va moliya" organlari deb o'zgartirildi). Shuningdek, ixtisoslashtirilgan va alohida ta'lim ehtiyojlari bo'lgan bolalar maktablarida sinflarni shakllantirish alohida Vazirlar Mahkamasi qarorlariga asosan amalga oshirilishi belgilandi.

❗️ Eslatma: Dars soatlarini taqsimlashning ushbu yangi ketma-ketlik tartibi 2026-yilning 1-avgustidan eʼtiboran kuchga kiradi. Qolgan o'zgarishlar rasmiy e'lon qilingan kundan kuchga kirdi.